کراچی : پاکستان پیپلز پارٹی کے چیئرمین بلاول بھٹو زرداری اور پی پی پی شعبہ خواتین کی مرکزی صدر فریال تالپور سے وزیراعلیٰ سندھ سید مراد علی شاہ نے ملاقات کی۔ میڈیا سیل بلاول ہاوَس سے جاری کردہ پریس رلیز کے مطابق، بلاول ہاوَس میں ہونے والی ملاقات کے دوران وزیراعلیٰ سندھ نے  پارٹی  قیادت کو سیلاب کی صورت حال پر بریفنگ دی۔ چیئرمین بلاول بھٹو زرداری نے وزیراعلیٰ سندھ کو ہدایات دیتے ہوئے کہا کہ  سیلاب سے ممکنہ طور پر متاثرہ افراد   کی مدد کے لئے پیشگی اقدامات کیے جائیں، اور  اس کے ساتھ ساتھ سیلابی ریلے اور اس کے اثرات کی مانیٹرنگ کے نظام کو مزید مؤثر کیا جائے۔  انہوں نے   مزید کہا کہ سندھ حکومت کے وزراء اور پاکستان پیپلزپارٹی کے عہدیداران و کارکنان اس کڑے وقت میں عوام کے ساتھ کھڑے ہوں۔  وزیراعلی سندھ سید مراد علی شاہ نے پارٹی قیادت کو یقین دہانی کرائی کہ سندھ حکومت سیلاب اور اس کے بعد پیدا ہونے والی صورت حال کا مقابلہ کرنے کے لئے تیار ہے۔