پاکستان پیپلز پارٹی کے چیئرمین بلاول بھٹو زرداری نے وفاقی حکومت کی جانب سے ماحولیاتی اور زرعی ایمرجنسی کے اعلان کا خیرمقدم کرتے ہوئے کہا ہے کہ یہ مطالبہ پیپلز پارٹی نے ہی کیا تھا۔ تاہم انہوں نے افسوس کا اظہار کیا کہ وفاقی حکومت اب تک گلگت بلتستان، خیبرپختونخوا، پنجاب اور خاص طور پر جنوبی پنجاب کے متاثرہ اضلاع کے لیے بینظیر انکم سپورٹ پروگرام کے تحت کسی ریلیف کا اعلان نہیں کر سکی۔

بلاول بھٹو زرداری نے کہا کہ وزیر اعظم شہباز شریف نے ذاتی طور پر یقین دہانی کرائی تھی کہ متاثرینِ سیلاب کو بینظیر انکم سپورٹ پروگرام کے ذریعے ریلیف فراہم کیا جائے گا، مگر اس پر تاحال عمل نہیں ہو سکا۔ انہوں نے وفاقی حکومت کی جانب سے اقوامِ متحدہ کے نظام کے تحت بین الاقوامی امداد کے لیے اپیل میں تاخیر کو بھی ناقابلِ فہم قرار دیا۔

پیپلز پارٹی چیئرمین نے کہا کہ دنیا بھر میں بڑی آفات کے دوران ابتدائی 72 گھنٹوں میں عالمی برادری سے امداد کی اپیل معمول کی بات ہے۔ پاکستان نے ماضی میں 2005 کے زلزلے اور 2010 و 2022 کے سیلابوں کے دوران بھی یہ اپیل کی تھی۔ ان کا کہنا تھا کہ بین الاقوامی امداد کی اپیل نہ کرکے کروڑوں متاثرہ پاکستانیوں کو اس حق سے محروم رکھنے کی کوئی جواز نہیں ہے۔

انہوں نے وفاقی حکومت سے فوری طور پر بین الاقوامی اداروں سے رابطے اور امداد کی اپیل کرنے کا مطالبہ کیا اور اعلان کیا کہ پیپلز پارٹی اس حوالے سے قومی اسمبلی، سینیٹ اور تمام صوبائی اسمبلیوں میں قراردادیں پیش کرے گی۔

بلاول بھٹو زرداری نے بتایا کہ حالیہ دورہ جات کے دوران ان کی وزیراعلیٰ سندھ اور صوبائی وزیرِ زراعت سے ملاقاتیں ہوئی ہیں جن میں زرعی برادری کی بحالی پر غور کیا گیا۔ ان کا کہنا تھا کہ سیلاب سے سب سے زیادہ زرعی شعبہ متاثر ہوا ہے اور وفاقی حکومت کو اس کی بحالی کے اقدامات میں بھرپور تعاون کرنا چاہیے۔

چیئرمین پیپلز پارٹی نے وفاقی حکومت سے مطالبہ کیا کہ ملک میں زرعی ایمرجنسی نافذ کی جائے، زیرِ آب علاقوں کے بجلی کے بل معاف کیے جائیں اور متاثرہ خاندانوں کو بینظیر انکم سپورٹ پروگرام کے تحت فوری ریلیف فراہم کیا جائے۔

بی بی آصفہ بھٹو زرداری نے بھی کہا کہ پیپلز پارٹی سیلاب متاثرین کی بحالی اور عالمی اداروں سے فوری رابطوں کے لیے پارلیمان کے ہر فورم پر آواز بلند کرے گی۔