لاہور (نامہ نگار) پاکستان پیپلز پارٹی وسطی پنجاب کے سینئر نائب صدر رانا فاروق سعید نے حکومت پر زور دیا ہے کہ وہ سیلاب سے متاثرہ علاقوں میں فوری طور پر ہنگامی امدادی کارروائیاں شروع کرے۔ انہوں نے کہا کہ پیپلز پارٹی کی تنظیموں کو متاثرین کی مدد کے لیے بلا تاخیر اپنی سرگرمیاں تیز کرنی چاہئیں، کیونکہ یہ وہ وقت ہے جب ہمیں بلا امتیاز تمام متاثرہ افراد کی مدد کے لیے آگے آنا ہوگا۔ رانا فاروق سعید یہ بات ماڈل ٹاؤن لاہور میں پیپلز پارٹی کے کارکنان سے خطاب کے دوران کہی۔  

اس موقع پر پارٹی کے متعدد سرکردہ رہنماؤں نے بھی شرکت کی، جن میں احمد گھمن، احسن رضوی، ذیشان شامی، نسیم صابر، فرخ بصیر، بشارت علی اور مدثر شاکر شامل تھے۔ انہوں نے بھی سیلاب زدگان کی مدد کے لیے فوری اقدامات اٹھانے پر زور دیا اور کہا کہ حکومت اور تمام سیاسی و سماجی اداروں کو مل کر اس بحران سے نمٹنے کے لیے ٹھوس اقدامات کرنے چاہئیں۔