صوبے کے جنگلات، گیس، ایل پی جی اور پانی جیسے وسائل وفاق کے کنٹرول میں ہیں، اور اب وفاق معدنی وسائل کو بھی اپنے اختیار میں لینے کی کوشش کر رہا ہے، :پاکستان پیپلزپارٹی کے رہنما ڈاکٹر عالم زیب مہمند

Editor

4 ماہ قبل

پاکستان پیپلزپارٹی کے رہنما ڈاکٹر عالم زیب مہمند نے پریس کانفرنس میں خیبر پختونخوا کے قدرتی وسائل اور وفاقی حکومت کی مداخلت پر تشویش کا اظہار کیا۔ انہوں نے کہا کہ صوبے کے جنگلات، گیس، ایل پی جی اور پانی جیسے وسائل وفاق کے کنٹرول میں ہیں، اور اب وفاق معدنی وسائل کو بھی اپنے اختیار میں لینے کی کوشش کر رہا ہے، جو آئین کی خلاف ورزی ہے۔ ڈاکٹر عالم زیب نے منرل ایکٹ 2017 کی اہمیت پر زور دیتے ہوئے کہا کہ کسی بھی تبدیلی کے لیے تمام فریقین کی مشاورت ضروری ہے۔

‎انہوں نے ماربل سٹی اکنامک زون کے منصوبے کی تکمیل کی ضرورت پر زور دیا، جس سے ہزاروں افراد کو روزگار کے مواقع مل سکتے ہیں۔ علاوہ ازیں، انہوں نے مہمند اور کرک جیسے علاقوں میں قدرتی ذخائر سے فائدہ اٹھانے کی تجویز دی اور حکومت سے مطالبہ کیا کہ مہمند ڈیم اور ورسک ڈیم سے حاصل ہونے والے منافع کا 15 فیصد مہمند کو دیا جائے۔

‎ڈاکٹر عالم زیب نے زرعی زمین کی سیرابی کے لیے حکومتی اقدامات پر زور دیتے ہوئے کہا کہ جدید آبی وسائل سے 18 فیصد زمین سیراب کی جا سکتی ہے۔ آخر میں، انہوں نے وزیر اعلیٰ خیبر پختونخوا سے مطالبہ کیا کہ دریائے کابل سے مہمند کو پانی فراہم کرنے کے منصوبے کو سالانہ ترقیاتی پروگرام میں شامل کیا جائے تاکہ زرعی پیداوار اور مقامی کسانوں کی معاشی حالت بہتر ہو سکے۔