کوئٹہ::طالبات کو سکول چھوڑنے سے روکنے اور ان کا تعلیمی سلسلہ جاری رکھنے کے لیے، انہیں خواتین  کو درکار بنیادی صحت اور حفظانِ صحت کی سہولیات فراہم کرنا انتہائی اہمیت کا حامل ہے۔ان خیالات کا اظہار صوبائی وزیر تعلیم محترمہ راحیلہ حمید درانی نے محکمہ تعلیم میں منعقدہ ایک اعلیٰ سطحی اجلاس کی صدارت کرتے ہوئے کیا۔
اس اہم اجلاس کا مقصد بلوچستان بھر میں طالبات کو درپیش صحت و صفائی کے مسائل اور ان کے تدارک کے لیے موثر حکمتِ عملی مرتب کرنا تھا۔ اجلاس میں سیکرٹری سکول ایجوکیشن لال جان جعفر، سپیشل سیکرٹری ایجوکیشن عبدالسلام خان، ایم ایچ ایم ڈبلیو جی (MHMWG) سیکرٹریٹ کی چیئرپرسن ڈاکٹر طاہرہ کمال بلوچ اور شریک چیئرپرسن زلیخا کریم بلیدی سمیت دیگر اہم حکام نے شرکت کی۔
وزیر تعلیم راحیلہ حمید درانی نے اپنے خطاب میں اس بات پر زور دیا کہ طالبات کی فلاح  و بہبود کے لیے حفظانِ صحت کے بنیادی اصولوں پر عمل درآمد ناگزیر ہے۔ انہوں نے واضح کیا کہ طالبات کے لیے صحتِ عامہ کی ضروری اشیاء کی قوتِ خرید اور ان تک آسان رسائی آج بھی ایک بڑا چیلنج ہے اور سکولوں میں حفظانِ صحت کے بہتر انتظامات نہ صرف بچیوں کے سکول چھوڑنے (ڈراپ آؤٹ) کی شرح میں نمایاں کمی لانے میں مددگار ثابت ہوں گے، بلکہ یہ ان کی مجموعی صحت، وقار اور فلاح و بہبود کے لیے بھی بنیادی اہمیت رکھتے ہیں۔
 قبل ازیں ایم ایچ ایم ڈبلیو جی (MHMWG) سیکرٹریٹ کی چیئرپرسن ڈاکٹر طاہرہ کمال بلوچ نے ورکنگ گروپ کی جاری کوششوں کا تفصیلی ذکر کیا۔ انہوں نے صحت و صفائی کی ضروری اشیاء کو سستا اور عام بچیوں کی پہنچ میں لانے کے لیے بامعنی ٹیکس اصلاحات کی مہم کا ذکر کیا اور اس ضمن میں یونیسف (UNICEF) پاکستان سمیت دیگر شراکت داروں کے کلیدی کردار پر روشنی ڈالی۔
اجلاس کے دوران سیکرٹری سکول ایجوکیشن لال جان جعفر اور سپیشل سیکرٹری ایجوکیشن عبدالسلام خان نے ان اصلاحات اور اقدامات کے نفاذ کے لیے محکمہ تعلیم کی جانب سے مکمل انتظامی تعاون کی یقین دہانی کرائی۔اجلاس کے اختتام پر حکومتِ بلوچستان اور متعلقہ شراکت داروں نے اس عزم کا اعادہ کیا کہ طالبات کی تعلیم کی راہ میں حائل صحت کے قابلِ حل مسائل کو دور کرنے کے لیے مشترکہ اور ٹھوس کاوشیں جاری رکھی جائیں گی۔