کراچی: پاکستان پیپلزپارٹی کے چیئرمین بلاول بھٹو زرداری کی سربراہی میں لیاری ٹرانسفورمیشن پراجیکٹ کے حوالے سے اہم اجلاس منعقد ہوا۔

اجلاس کے دوران نیسپاک حکام نے چیئرمین بلاول بھٹو زرداری کو لیاری کی ازسرنو بحالی سے متعلق اپنی تفصیلی سروے رپورٹ پیش کی۔ بریفنگ میں بتایا گیا کہ لیاری میں سیوریج اور واٹر سپلائی کے نظام کو مکمل طور پر دوبارہ تعمیر کرنا ہوگا۔

اس موقع پر نیسپاک کی جانب سے روڈ انفراسٹرکچر اور کچرا اٹھانے کے نظام سے متعلق رپورٹ بھی پیش کی گئی۔ اجلاس میں سندھ کے وزیر بلدیات سعید غنی، جمیل سومرو، جاوید ناگوری اور جنید جیدی بھی شریک تھے۔

چیئرمین بلاول بھٹو زرداری نے ہدایت دی کہ ترقیاتی منصوبہ بندی کرتے وقت مستقبل کی بڑھتی ہوئی آبادی کی ضروریات کو بھی مدنظر رکھا جائے۔ انہوں نے لیاری کو مکمل طور پر سولرائز کرنے اور اندرونی علاقوں میں پیپلزبس سروس شروع کرنے کی بھی ہدایت دی۔

اجلاس میں چیف سیکریٹری سندھ سید آصف حیدر شاہ، لیاری ٹرانسفورمیشن اتھارٹی کے پراجیکٹ ڈائریکٹر فہیم چاچڑ، میونسپل کمشنر حماد این ڈی خان سمیت نیسپاک کے جنرل منیجر منور عباس، ریحان ضامن اور علی شیر شاہ بھی موجود تھے۔