اُرمچی، 18 ستمبر — صدرِ پاکستان آصف علی زرداری نے اُرمچی میں کمیونسٹ پارٹی کے سیکریٹری برائے سنکیانگ چن شیاوجیانگ سے ملاقات کی۔ ملاقات میں گورنر سنکیانگ ارکن تونیا ز بھی شریک تھے۔

چن شیاوجیانگ نے صدر زرداری کا خیرمقدم کرتے ہوئے کہا کہ فروری 2025 میں بیجنگ میں صدر شی چن پنگ اور صدر زرداری کی ملاقات کے دوران اہم معاہدوں پر دستخط ہوئے تھے۔ انہوں نے مزید کہا کہ وزیراعظم شہباز شریف کے حالیہ دورۂ چین کے بعد سی پیک کے دوسرے مرحلے پر کام کی رفتار مزید تیز ہوئی ہے۔

چن شیاوجیانگ نے بتایا کہ سنکیانگ خوشحالی اور پائیدار امن کا مرکز بن چکا ہے اور اس کا جی ڈی پی 5.6 کھرب یوان سے تجاوز کر گیا ہے۔ انہوں نے کہا کہ خطہ انتہا پسندی کی بنیادی وجوہات پر قابو پانے اور سماجی ترقی کے لئے مؤثر اقدامات کر رہا ہے۔ ان کا کہنا تھا کہ پاکستان اور چین کے درمیان آٹھ سسٹر سٹی معاہدے موجود ہیں جن میں اُرمچی اور پشاور بھی شامل ہیں۔ دونوں ممالک دہشتگردی اور علیحدگی پسندی کے خلاف زیرو ٹالرنس پالیسی پر کاربند رہیں گے۔

صدر آصف علی زرداری نے کہا کہ چین کے عوام کی یکجہتی اور سنکیانگ کی ترقی قابلِ تقلید ہے۔ انہوں نے کہا کہ پاکستان اور چین کی دوستی وقت کی آزمائش پر پوری اتری ہے اور پاکستان کی خارجہ پالیسی کا ایک اہم ستون ہے۔

صدر زرداری نے اس عزم کا اظہار کیا کہ پاکستان دہشتگردی اور انتہا پسندی کے خاتمے کے لئے چین کے ساتھ بھرپور تعاون جاری رکھے گا۔ انہوں نے کہا کہ دونوں ممالک زراعت، صنعت، معدنیات اور نئی ٹیکنالوجی کے شعبوں میں شراکت داری کو مزید فروغ دیں گے۔ صدر زرداری نے امید ظاہر کی کہ جلد دونوں ممالک کے عوام سڑک کے ذریعے آسانی سے ایک دوسرے کے ملک کا سفر کر سکیں گے۔

اس موقع پر سینیٹر سلیم مانڈوی والا، سندھ کے وزیر توانائی ناصر شاہ، پاکستان اور چین کے سفیر بھی موجود تھے۔