چنگدو: صدر آصف علی زرداری نے چین کے صوبہ سچوان کے دورے کے دوران پولیٹیکل بیورو کے رکن اور وزارتِ پبلسٹی ڈیپارٹمنٹ کے وزیر لی شو لی سے ملاقات کی۔ ملاقات میں دونوں رہنماؤں نے سیاسی، اقتصادی اور ثقافتی شعبوں میں دوطرفہ تعاون کو مزید فروغ دینے پر تبادلۂ خیال کیا۔

صدر زرداری نے صوبہ سچوان میں شاندار مہمان نوازی پر شکریہ ادا کرتے ہوئے دوسرے گولڈن پانڈا فورم کے کامیاب انعقاد پر مبارکباد دی۔ اس موقع پر لی شو لی نے صدر زرداری کو چین میں خوش آمدید کہا اور صدر شی جن پنگ کی نیک تمناؤں کا پیغام بھی پہنچایا۔

لی شو لی نے صدر زرداری کے فروری میں چین کے دورے اور حال ہی میں چائنا ڈےلی میں شائع ہونے والے مضمون کی تعریف کرتے ہوئے کہا کہ صدر زرداری اور صدر شی جن پنگ نے پاکستان-چین تعلقات میں مضبوط قیادت فراہم کی ہے، دونوں ممالک ہمیشہ مضبوط بھائی رہیں گے۔

انہوں نے مزید کہا کہ "دنیا کو آج کتابوں کی خوشبو کی ضرورت ہے نہ کہ بارود کی بو" اور اس بات پر زور دیا کہ پاکستان اور چین کی دوستی آنے والے برسوں میں مزید مستحکم اور فروغ پائے گی۔