اسلام آباد: خاتونِ اوّل بی بی آصفہ بھٹو زرداری نے بچوں کی صحت کے تحفظ اور ماؤں کو بااختیار بنانے سے متعلق ایک تاریخی مشترکہ اعلامیے پر دستخط کر دیے۔ اس موقع پر سندھ کی صوبائی وزیر صحت عذرا پیچوہو سمیت اراکینِ پارلیمان بھی موجود تھے، جنہوں نے ماں کے دودھ پلانے کے فروغ سے متعلق اس اعلامیے پر دستخط کیے۔

یہ اعلامیہ پاکستان انسٹی ٹیوٹ فار پارلیمنٹری سروسز میں یونیسف اور پاکستان پیڈیاٹرک ایسوسی ایشن کے زیرِ اہتمام منعقدہ پارلیمنٹرین ایڈووکیسی فورم کے دوران منظور کیا گیا۔

اعلامیے کے مطابق ماں کے دودھ پلانے کو صحت اور ترقی میں ایک قومی سرمایہ کاری کے طور پر تسلیم کیا جائے گا۔ ماں کے دودھ کے متبادل کی مارکیٹنگ کو ریگولیٹ کرنے والے قوانین پر مؤثر عملدرآمد کیا جائے گا اور ماں کے دودھ پلانے کو قومی صحت کے نظام کا حصہ بنایا جائے گا۔

مزید برآں، ماؤں کے لیے کام کی جگہ پر بہتر سہولیات اور تحفظ فراہم کرنے کے ساتھ ساتھ ثقافتی رویوں میں مثبت تبدیلی کے لیے کمیونٹی کی شمولیت بڑھانے پر زور دیا گیا۔

تقریب میں یونیسف کی نمائندہ پرنیلے آئرن سائیڈ، ڈپٹی نمائندہ شرمیلا رسول، سیکریٹری ویمن پارلیمنٹری کاکس شاہدہ رحمانی، یونیسف کے چیف نیوٹریشن ڈاکٹر آنتنے گرما، جینڈر اینڈ ڈویلپمنٹ اسپیشلسٹ فہمیدہ خان، ای سی ڈی مینیجر ڈاکٹر صبا شجاع اور نیوٹریشن اسپیشلسٹ ڈاکٹر مظہر بھی شریک تھے۔